الى أين تحب أن تسافر؟

مدونة فلاي إن تطلعك على أفضل الوجهات حول العالم.

دليلك الشامل لحضور كأس العالم 2018

بعد 28 سنة مصر تتأهل لكاس العالم و هتقدر تسافر روسيا تشجع من هناك من غير فيزا يعني سفر و تجربة جديدة و تشجيع من المدرج

هنساعدك في المقالة دي تعرف ازاى تشتري تذاكر الماتشات خطوة بخطوة، تعرف أسعارها، مراحل الحجز، طرق الدفع، و ازاي هتدخل روسيا من غير فيزا

أول حاجة إمتى تشتري التذاكر؟

في 3 مراحل تقدر تحجز في اي مرحلة فيهم، كل مرحلة فيها الإختيار العشوائي و الحجز بالأسبقية

المرحلة الأولى بدأ الحجز فيها بالقرعة و انتهى يوم 12 اكتوبر و هيبدأ الحجز بالأسبقية يوم 16 نوفمبر

كل اللي حجزوا في فترة الإختيار العشوائي هيتم إعلامهم اذا كان طلبهم اتقبل او اترفض قبل بداية الحجز بالأسبقية

المرحلة التانية هيبدأ فيها الحجز بالقرعة يوم 5 ديسمبر و ينتهي 31 يناير – ويبدأ الحجز بالأسبقية يوم 13 مارس و ينتهي 3 إبريل

المرحلة التالتة الحجز بالأسبقية بس هو اللي متاح في المرحلة دي

الحجز بالقرعة كل المتقدمين بياخدوا نفس الفرصة سواء قدمت في اول الفترة او في اخرها، على عكس الحجز بالأسبقية اللي علشان يبقى ليك حظ فيه لازم تقدم بدري على الحجز

بعد اختيارك للمرحلة اللي ناوي تحجز فيها بتدخل على موقع الفيفا وتتابع الخطوات دي

 هتدخل على موقع الفيفا و تختار شراء التذاكر: http://www.fifa.com/worldcup/index.html

 بعدين هيطلب منك تعمل حساب على الموقع او لو حجزت تذاكر عليه قبل كده هتدخل بحسابك عادي

وانت بتعمل حساب جديد هيتبعت كود على الايميل اللي كتبته في التسجيل، هتكتبه في الخانة اللي تحت الايميل علشان يأكد الحساب

اختار جنسيتك و بلد إقامتك (الروسيين ليهم اماكن خاصة في المدرجات)

الخطوة اللي دايما بتعديها و بتوافق من غير ما نقراها (الشروط والأحكام)

 المرة دي لازم تقرأها علشان في شروط و احكام لو مركزتش فيها هتضيع سفريتك بس دول اهم 5 نقط لازم تركز فيهم

 لو التذكرة ضاعت او اتقطعت موقع الفيفا مش مسئول عنها و مش هيطلعلك بديل

 مينفعش تدفع بكريديت كارد بياناتها مختلفة عن بيانات الحساب اللي سجلته يعني لازم الاسماء تكون متطابقة

 مينفعش تلغي الحجز او ترجع التذكرة بس الموقع بيتيح لك انك تعرضها للبيع عنده

 لو حجزت في المرحلة التالتة مش هيكون في خدمة توصيل للتذكرة، تقدر تستلمها من اي مركز توزيع هناك في روسيا لما توصل

 مش بيشترط تقعد في نفس المكان في كل ماتش ومش شرط لو حاجز اكتر من تذكرة يكونوا جنب بعض

بعد ما تقرأ الشروط و الاحكام بتوافق عليها علشان تكمل باقي الخطوات

في الخطوة اللي جاية هتختار نوع التذكرة اللي عايزها

3 أنواع بتختار منهم واحد

اول نوع بتختار فيه حضور ماتش واحد من أول ماتش الافتتاح حتى ماتش النهائي

تاني نوع بتختار إستاد معين تحضر فيه كل الماتشات المقامة فيه و ده هيكون اختيار كويس لو مش حابب تتنقل بين المدن بس ممكن الاستاد ده ميتعملش فيه ولا ماتش لمصر

تالت اختيار هو حضور ماتشات فريق واحد يعني تقدر تحضر 3 ماتشات لمصر في اي استاد، التذكرة بتديك ال3 ماتشات

 وفي الخطوة دي بتختار الدرجة اللي عايز تحجز عليها

في 4 درجات تقدر تحجز على الدرجة الاولى او التانية او التالتة، الرابعة مخصصة لحاملين جنسية البلد المستضيف

خطوة تأكيد الحجز

واخيرا بتكتب بياناتك وبيانات الكريديت كارد و العنوان اللي عايز التذاكر توصلك عليه (اتأكد ان الكريديت كارد فيها رصيد كفاية يغطي تمن التذكرة)

الدفع بيكون عن طريق الكريديت كارد او التحويل البنكي

بعد تأكيد طلب الحجز و موافقة الفيفا عليه هيتبعتلك التذكرة على الايميل و هتتبعتلك على العنوان اللي كتبته عن طريق شركة شحن وهتوصل من بين شهر ابريل و مايو

بعد تأكيد حجز التذكرة تقدر تطلع الFan ID

اللي يعتبر بديل للفيزا و بيسمحلك بدخول البلد و استخدام المواصلات العامة و التنقلات بين المدن مجانا

تقدر تقدم عليه من هنا:

fan-id.com

بيطلب منك ترفع صورة حديثة ليك و رقم التذكرة او طلب الحجز وتكتب بياناتك و تسجل

بيتبعتلك على الايميل خلال 72 ساعة و بتطبعه (ألوان) و بتاخده معاك و انت مسافر مع الباسبور

 يعني مش هتحتاج غير تذكرة الماتش و تطلع الفان آي دي علشان تسافر روسيا وتشجع من المدرج

ناقص حجز تذاكر الطيران و الفنادق و تقدر تحجزهم من هنا

 www.flyin.com

LEAVE A COMMENT
Bitnami